Thursday, April 11, 2019

हामीहरू र उनीहरू - मातृका पोखरेल

उनीहरुको कुरा नमिलेको समाचार
राष्ट्रिय अखबारमा छापिएपछी
हामी पनि तुरुन्तै छुट्टियौ ।

फेरि अखबारले एउटा खबर छाप्यो
उनीहरु मिलेको खबर
हामी पनि न कुनै प्रश्न न कुनै सन्देह
फेरि तुरुन्तै मिल्यौ ।

उनीहरुको द्वन्द पढ्छाैं
हामीहरु सडकमै झगडा गर्छौं ,
हामीहरु पनि नयाँनयाँ शव्द थुपारेर
उनीहरुलाई गाली गरिदिन्छौ ।

उनीहरु मिल्छन,
हामिहरु पनि प्रशंशाका थुङ्गाहरु जोड्दै
खुसी भएरै अङ्कमाल गरिदिन्छौ ।

यतिखेर उनीहरु , उनीहरु भएर लडिरहेका छन्
हामी, उनीहरु भएरै लडिरहेका छौं
हामी, उनीहरु भएर बाँडिएका छौं 
हामी, उनीहरु भएरै मिलिरहेका छौं ।

उनीहरु उकालो चढ्छन्
हामी पनि उकालो चढिदिन्छौ
उनिहरु ओरालो झर्छन
हामी पनि सँगसँगै ओरालो झरिदिन्छौ

उनीहरु कसैलाई गाली गर्दै कतैतिर लाग्छन्
हामी पनि सँगसँगै हिडिदिन्छौ
उनीहरु फेरि अर्कैलाई गाली गर्दैगर्दै अर्कैतिर लाग्छन्
हामी कुनै प्रश्न गर्दैनौं
सँगसँगै हिंडिदिन्छाैं

उनीहरु गीत गाइदिन्छन
टेपरेकर्डले जस्तै उनीहरुकै लयमा
उनीहरु सँगसँगै हामी पनि गाइदिन्छौ ।

कवि भूपीले लेखेजस्तो
हामी क्यारेमबोर्डका गोटीमात्र पनि होइन रहेछौं
हातले समाएर हान्नै नपर्ने
उनीहरुले केही भन्नै नपर्ने
उनीहरुले ताकेको क्षितिज हेर्दै
त्यतैत्यतै हिडिदिने ।

हामी, कहिल्यै हामीहरु हुन सकेनौं
हामी पनि उनिहरुनै भयौं , मात्र उनीहरु भयौं ।
000

Thursday, September 27, 2018

शहरमा मार्क्स - मातृका पोखरेल

शहरबाट मार्क्स हराएको केही समय पछि
मैले उनलाई अस्ति एक्कासी बागबजारको श्रेष्ठ टेलरिङ्ग छेउमा भेटें ।

उनले मलाई पुरै बिर्सिसकेका रहेछन्
उनै पुराना कार्ल मार्क्स हुन भन्ने थाहा पाएपछि
मैले लालसलाम कमरेड भने,
र हात मिलाउन खाेजेँ
उनले अफ्ट्यारो मान्दै हात मिलाए ।

मैले उहिले भेट्दा उनले दारी पालेका थिए
हिजोआज जुँगामात्र राखेर दारी काटेछन
मनमनै लाग्यो- बुढा दारीमैं सुहाउँथे
राम्रो गरेनछन । 

आरामविरामका केही औपचारिक कुरा भए
उनले मलाई सोधे
श्रेष्ठ टेलरिङ्ग कहाँनेर पर्छ ?
मैले हातको इसाराले श्रेष्ठ टेलरिङ्ग देखाइ दिएँ ।
'त्यहाँ दौरासुरुवाल राम्रो सिलाउँछ भन्ने सुनेको थिएँ '
ऊनी स्पष्टीकरण दिँदै श्रेष्ठ टेलरिङ्गतिर गए
ऊनी गएको बाटो लामो समय मैले हेरिरहेँ ।

आज मैले फेरि उनलाई इन्द्रचोकनेरको एउटा गल्लीमा भेट्टाएँ
आज उनी दौरासुरुवालमा सजिएका थिए
घनिष्टता वोध गरेर हात मिलाउन खाेजेँ
मैले बढाएको हात नदेखेझैं गरे उनले
त्यसपछि मैले नमस्कार गरेँ
उनले खुसीका साथ नमस्कार फर्काए
कुनै पसलको खोजीमा थिए उनी
उनले खोजेको पसल मैले जान्न चाहेपछी
एकछिन अक्माकिए ऊनी
बिर्के टोपी पाइने दुकान कता होला बाबू ?
निकै अफ्ट्यारो मान्दै उनले फेरि सोधे ।

शहरबाट मार्क्स हराएको केही समय पछि
मैले उनलाई आज एक्कासी इन्द्रचोकको एउटा पुरानो गल्लीमा भेटें
उनी बिर्के टोपीको दुकान खोज्दै थिए ।

000 

Friday, September 21, 2018

परिवर्तित सन्दर्भमा प्रगतिशील लेखक सङ्घ - मातृका पोखरेल


साभार : गोरखापत्र दैनिक २०७५ साल असोज ५ गते शुक्रवार 

---------------------------------------------------------------------------------------------------------
परिवर्तित सन्दर्भमा प्रगतिशील लेखक सङ्घ
-  मातृका पोखरेल


वि.सं. २००९ मा प्रगतिशील लेखक सङ्घको स्थापना स्वस्फूूर्त नभएर समयको आवश्यकता थियो । पश्चिम नेपालमा वि.सं. १८०४ मा जन्मिएका शशिधर पौडेलको जोसमनी सन्त परम्पराको अनुुयायी बनेर सञ्चालन गरेको अभियान, ज्ञानदिलदासको अभियान, योगमायाको अभियान, वि.सं. १९७७ सालको मकैपर्व, धरणीधर कोइरालाको ‘नैवेद्य’ प्रकाशन आदि अभियान र प्रकाशनले प्रगतिशील साहित्यिक आन्दोलनको महìवपूूर्ण आधारभूूमि तयार भइरहेको थियो । यी सबै घटनाहरूको प्रभाव स्वरूप नेपालका बुुद्धिजीवी र साहित्यकारहरूलाई एउटा बलियो संगठनको आवश्यकता परिरहेको थियो । त्यही आवश्यकताको बीचबाट प्रगतिशील लेखक सङ्घको जन्म हुनपुुग्यो । 
प्रगतिशील साहित्यिक अभियान र सङ्गठित ढङ्गले अघि बढ्नुुका पछाडिको पृष्ठभूूमि खोज्दै जाँदा हामी धेरै टाढा अर्थात् प्राथमिक कालतिरै पनि पुुग्न सक्दछौं । प्राथमिक कालमा भानुुभक्त आचार्यहरूले रामकथाका माध्यमबाट जसरी नेपाली समाजमा आध्यात्मिक आदर्श र भाग्यवादको प्रचार गरिरहेका थिए, त्यसको विरुद्धमा निर्गुुण भक्तिधाराअन्तर्गतका सन्त साहित्यकारहरूले सामाजिक विकृति, धार्मिक विकृति, कर्मकाण्डीय विकृतिका विरुद्धमा आलोचनात्मक चेतना सहितको साहित्य सिर्जना गरे । त्यतिबेलैदेखि धार्मिक पाखण्डका विरुद्ध आलोचनाको स्वर प्रकट हुनथाल्यो । 

माध्यमिक काललाई हामी शृङ्गारकालका रूपमा लिने गर्छौं । राणाशासनको जाँतोमुुनि चेपिएको अवस्थामा शासकहरूको खुुसी पार्नु साहित्यको प्रधानता रहेको समयमा सामाजिक चिन्तनमुुखी प्रभाव खासै पाइँदैन । उन्नाइसौं शताब्दीको अन्तिमतिर सामान्ती सोच र संस्कारका विरुद्धमा आलोचनात्मक स्वर अघि बढेको पाइन्छ । धरणीधर कोइरालाले ‘नयपाली ठिटो’ कविता मार्फत गणतन्त्रको चेतना प्रकट परे । गोपालप्रसाद रिमालले ‘आमाको सपना’ कविता मार्फत क्रान्तिचेतनाको अभिव्यक्ति दिए । उनका क्रान्तिधर्मी कविताबाट नेपाली प्रगतिवादी कविताको आरम्भ र विकासमा महìवपूूर्ण पृष्ठभूूमि निर्माण भएको छ । वि.सं. २००३÷००४ तिर लक्ष्मीप्रसाद देवकोटाको ‘साँढे’ ‘प्रभुुजी ! मलाई भेडो बनाउ’, जस्ता कविताले तत्कालीन निरङ्कुुशता र उत्पीडनको विरुद्ध आलोचनात्मक स्वर प्रकट भयो । 


वि.सं. २००६ मा औपचारिक रूपमा नेपालमा कम्युुनिस्ट पार्टीको स्थापना भएपछि नेपालमा माक्र्सवादी चिन्तन र दर्शनको प्रवेश भयो । वि.सं. २००७ कै सेरोफेरोमा नेपालमा प्रगतिवादी साहित्यले गति लिन थाल्यो । वि.सं. २००८ मै कृष्णचन्द्रसिंह प्रधानले ‘भन्ज्याङ्निरै’ कवितासङ्ग्रह प्रकाशन गरेर पहिलोपटक व्यक्तिगत रूपमा प्रगतिशील साहित्यिक कृतिको आरम्भ गरे । 

प्रगतिशील लेखक सङ्घको स्थापन पछि नेपाली साहित्यमा नयाँ दृष्टिकोण र नयाँ सोचको विकास तीव्र रूपमा भयो । यथास्थितिभन्दा केही अघि बढ्ने दृष्टिकोण भएका स्रष्टालाई यसले भरपर्दो छहारी प्रदान ग¥यो । लेखकहरूले वैचारिक लक्ष्य र आदर्शलाई कला साहित्यमा स्थापित गर्न थाले । सामन्तवाद र साम्राज्यवाद विरोधी धारणाले बल पाउन थाल्यो । प्रगतिशील लेखक सङ्घको स्थापनापछि प्रगतिशील भावधारामा सिर्जना गरिरहेका स्रष्टाहरू क्रमशः प्रगतिवादी धारा अर्थात् माक्र्सवादी धारामा सिर्जना गर्न पुुग्दछन् । प्रगतिशील लेखक सङ्घकै अगुवाइमा नयाँ पुुस्ताले एउटा विद्रोही चेतना भेट्यो । गोकुुल जोशी, केवलपुुरे किसान आदिका कविताहरूले कविता ‘मालिक’हरूको सेवामा मात्र फन्को मारेर बस्ने कुुरा होइन, झुुप्राहरूमा बस्ने शोषित पीडितहरूको पक्षमा पनि बोल्न सक्दो रहेछ भन्ने सन्देश जनजनको बीचमा पुुग्यो । नेपाली युुवामा आएको राष्ट्रिय अन्र्तराष्ट्रिय जागरणको हुुटहुुटी र छटपटीको परिणाम स्वरूप यो संस्था स्थापित भएपछि प्रगतिशील साहित्यिक पत्रिकाहरू व्यवस्थित रूपमा निस्कन थाले । श्यामप्रसाद शर्मा, केवलपुुरे किसान, गोकुुल जोशी, युुद्धप्रसाद मिश्र, भूपि शेरचन, रमेश विकलहरूले प्रगतिशील साहित्यको आरम्भिक कालमा संगठन र सिर्जनाका दुवै क्षेत्रबाट सक्रिय हस्तक्षेप गरे । 

वि.सं. २००७ को सेरोफेरोबाट सुुरु भएको नेपाली साहित्यको नवीन सोच र चिन्तनलाई सङ्घले सांगठनिक नेतृत्व प्रदान गरेर अघि बढेको पाइन्छ । स्थापनाको पहिलो दशकसम्म यो संस्थाको सक्रियता मनग्गे देखिए पनि वि.सं. २०२० पछि भने लामो समय निष्क्रिय अवस्था रह्यो । तर पनि प्रगतिशील स्रष्टाहरूले कला साहित्यमा विचार, दर्शन, यथार्थ र कल्पनाको समन्वय गरेर सिर्जना गर्न छाडेनन् । निरङ्कुुश पञ्चायती व्यवस्थाको विरुद्धमा प्रगतिशील स्रष्टाहरूले अग्रिम मोर्चामा रहेर अभिव्यक्तिको माध्यमबाट मात्र नभएर भौतिक रूपमै सडकमा उत्रिए । तीसको दशकमा बुुटवलमा गठित रेलिमाइ सांस्कृतिक मण्डल र त्यसपछि राष्ट्रिय गतिविधिमै सर्वाधिक चर्चित ‘संकल्प’ परिवार र ‘वेदना’ परिवारको सक्रियताले नेपाली समाज रूपान्तरणकै इतिहासमा सर्वाधिक महìव राख्दछ । 

वि.सं. २०४६ चैत्र ३ को प्रदर्शन होस् या २०५८÷०५९ सालमा तत्कालीन राजा ज्ञानेन्द्रको निरङ्कुुशताका विरुद्धमा सञ्चालित आन्दोलनका सन्दर्भमा बनेका प्रतिगमन विरोधी स्रष्टाहरूको संयुुक्त समिति वा लोकतान्त्रिक स्रष्टाहरूको संयुुक्त मञ्चको स्थापना र गतिविधिमा प्रगतिशील लेखक सङ्घको नेतृत्वदायी भूूमिका रह्यो । 

प्रगतिशील लेखक सङ्घको स्थापनापछि नेपाली साहित्यमा स्थापित नयाँ सौन्दर्य चेतना अहिलेसम्म आइपुुग्दा नेपाली साहित्यको मूूलधारमा यात्रारत छ । यतिबेला प्रगतिशील लेखक सङ्घको ६६ औं वार्षिकोत्सवको तयारी छ तर हाम्रा अघिल्तिर केही महìवपूूर्ण प्रश्नहरूले उत्तर खोजिरहेका छन् । यी प्रश्नका उत्तरहरू कसरी गम्भीरतापूूर्वक दिने कोसिस गर्छौं, प्रगतिशील आन्दोलनको भविष्य त्यसैमा निर्भर छ । 

वर्तमानसम्म आइपुुग्दा प्रगतिशील लेखक सङ्घमाथि केही प्रश्नहरू उठेका छन् । सङ्घमाथि मात्र होइन, प्रगतिशील लेखकमाथि पनि उठेका छन् । प्रगतिशील साहित्य र संस्कृतिको हितका निम्ति उठेका प्रश्नहरूप्रति सकारात्मक धारणासहित हामी अगाडि बढ्नुु जरुरी छ । 

प्रगतिशील लेखक सङ्घ सम्पूर्ण प्रगतिशील साहित्यकारहरूको साझा मोर्चा भए पनि केही साहित्यकारहरू यसमा आबद्ध हुन सकिरहेका छैनन् । त्यसको कारण खोज्न जरुरी छ । नेपाली जनताको हित चाहने लेखक सबैलाई यस संस्थामा गोलबन्द हुने वातावरण मिलाउन जरुरी छ । हामीले भोक, गरिबी, उत्पीडन, अज्ञानता र अन्धविश्वासबाट मुुक्त जीवनको निर्माणका निम्ति नेपाली श्रमजीवी जनता सँगसँगै समाज स्वरूप देख्नुुपर्छ । हाम्रा सिर्जना त्यही स्वप्नका कथा हुनुुपर्दछ । 


यताका केही वर्षदेखि प्रगतिशील लेखनमा वैचारिकताको अभाव रहेको धारणा धेरैतिरबाट आउन थालेको छ । पुरानो पिँढीमा देखापरेको वैचारिक निख्खरता नयाँ पिँढीमा नरहेको चर्चा चलिरहेकै छ । प्रगतिशील आन्दोलनमा हिँड्नेहरूका निम्ति यो समीक्षाको विषय हो । प्रतिबद्ध लेखन प्रगतिवादी लेखनको आधार हो । प्रतिबद्ध लेखनका बारेमा प्रगतिशील संगठनहरूमा हिँड्नेहरूमै द्विविधा देखिएको छ । प्रगतिशील सङ्घ÷संगठनमा हिँड्नेहरू नै सबै साहित्य प्रगतिशील हुुन्छ भनेर गैरवैचारिक कुरा गर्नेहरूको संख्या बढ्दो छ । यो दृष्टिकोणको समस्या हो । हाम्रो प्रगतिशील आन्दोलन दृष्टिकोणको समस्याबाट ग्रस्त छ भन्ने यो ठूूलो प्रमाण हो । 

नेपाली समाजमा व्यापक परिवर्तन आइरहेकै छ । पुराना विश्वास र मान्यताका आधारमा जगहरू हल्लिरहेका छन् । प्रगतिशील साहित्यमा सच्चाउनै पर्ने अर्को समस्या गुुटगत समस्या हो । यो समस्याले प्रगतिशील साहित्य अघि बढ्न केही अप्ठ्यारो परिरहेको छ । गुुटगत स्वार्थका कारण राम्रो साहित्य पछि पर्ने र कमजोर साहित्यको बढी चर्चा हुुने सम्भावना बढ्छ । यही कारण सम्पूर्ण प्रगतिशील साहित्यकारहरूबीच भाइचारा सम्बन्ध स्थापित हुन सकिरहेको छैन । कतिपय सन्दर्भमा प्रतिपक्षी लेखक÷साहित्यकारहरू भन्दा प्रगतिशील लेखन क्षेत्रका स्रष्टाहरू प्रति अनावश्यक आलोचनात्मक हुने प्रवृत्ति पनि देखिएको छ । यो चिन्तन आफैंमा अप्रगतिशील छ । यस्ता केही महìवपूूर्ण समस्याहरू प्रगतिशील आन्दोलनमा भएका कारण यो आन्दोलन प्रहार गर्नुुपर्ने ठाउँमा प्रहार नगरी आफै त्यसै भौँतारिएको महसुुस हुुन्छ । 

सामन्ती संस्कृति हाम्रो नसानसामा जरो गाडेर बसेको छ । साम्राज्यवादी संस्कृतिले  नयाँ रूप कलेवरमा हाम्रा सांस्कृतिक मूूल्यहरूमाथि आक्रमण गरिरहेको छ । देशमा व्याप्त अँध्यारो संस्कृति फालेर उज्यालो संस्कृति स्थापना गर्न कटिबद्ध हुनेहरूले प्रगतिशील लेखक सङ्घलाई नयाँ उत्साहका साथ अघि बढाउन सिवाय अर्को विकल्प छँदै छैन । श्रमजीवी जनतासँगको क्रमशः बढ्दै गएको दूरीलाई घटाउँदै कला साहित्यका माध्यमबाट नयाँ र सुुन्दर नेपाल बनाउने अभियानमा हाम्रो सिर्जनात्मक दृढता समयको माग हो ।

www.gorkhapatraonline.com बाट साभार 

Saturday, September 15, 2018

आजको प्रलेस : साझा प्रलेस - मातृका पोखरेल


अन्नपूर्ण फुर्सद २०७५ भाद्र ३० गते शनिवार 

-----------------------------------------------------------------------------------------

आजको प्रलेस, साझा प्रलेस


मातृका पोखरेल


सन्दर्भ : प्रलेसको ६५ वर्ष


नेपाल कम्युनिस्ट पार्टीको स्थापनालगत्तै प्रगतिवादी/प्रगतिशील साहित्य–संस्कृतिलाई अघि बढाउन गठित प्रगतिशील लेखक संघ (प्रलेस) कम्युनिस्ट आन्दोलनसँगसँगै सांस्कृतिक संगठनमा विभाजन आएपछि साझा मञ्चको अवधारणामा क्रियाशील रह्यो। संघले स्थापनाकालको केही वर्षसम्म जसरी सक्रियतापूर्वक काम गर्‍यो, त्यसपछिको लगभग दुई दशक गतिविधि शून्य प्रायः रह्यो। २०३६ सालमा पुनःसंगठित हुँदा कम्युनिस्ट पार्टीहरू र सांस्कृतिक संगठनहरू विभाजित अवस्थामा भएका कारण प्रलेस पनि साझा मञ्चका रूपमा चल्ने गरी पुनस्र्थापित भयो। ६५ वर्ष लामो इतिहास बोकेको यो संस्था पुनर्गठित भएपछि पनि ४० वर्ष पार गर्दैछ तर बेलाबेला यसको आवश्यकता, औचित्य र भूमिकाबारे प्रश्नहरू उठ्ने गरका छन्।
प्रलेसको आवश्यकता झन्झन् बढेको छ तर हामी नै समयको मागअनुसार मैदानमा उभिन सक्छौं कि सक्दैनौं भन्ने मुख्य प्रश्न हो।
किन उठ्यो औचित्यको प्रश्न ?
यतिबेला केही सञ्चारमाध्यम र सामाजिक सञ्जालमा प्रलेसको भूमिका र औचित्यबारे केही विषय उठान भएका छन्। यी प्रश्न आज मात्रै उठेका होइनन्। २०१७ सालतिर तत्कालीन अध्यक्ष धर्मराज थापा र सचिव तारानाथ शर्माले पनि आफ्नो संलग्नता दरबारतिर बढाउन थालेपछि प्रलेस गल्र्यामगुर्लुम ढलेको र आवश्यकता नभएको आरोप लगाएका थिए। २०१७ सालपछि अध्यक्ष बनेका कृष्णचन्द्रसिंह प्रधानले पनि पुष्पलाल र डीपी अधिकारीका निर्देशन आफूलाई मान्य नभएको आरोप लगाएर प्रलेसबाट आफूलाई अलग बनाए। त्यसबेला प्रलेसभित्रको विवादमा दरबारपरस्त चिन्तन र झुप्रापरस्त चिन्तनको द्वन्द्व नै मूल कारण थियो। राजा महेन्द्रको २०१७ सालको कदमपछि धेरै प्रगतिशील लेखक प्रगतिशील आन्दोलनलाई धारे हात लगाउँदै पञ्चायतको सेवा गर्न पुगे।
२०३६ सालपछिको पुनर्गठित प्रलेसमा पनि ठूलाठूला मतभेद र विवाद भए। पहिलो राष्ट्रिय सम्मेलनपछि उत्पन्न मोदनाथ प्र िश्रत र पारिजातको ‘साइलक’ प्रकरण प्रलेसजस्तै साझा मोर्चा भनेर गठन भएको ‘राष्ट्रिय जनसांस्कृतिक संघ’को कारण उब्जिएको थियो। यो विवादको अन्तर्यमा प्रलेसको काममा बाधा नपरोस् भन्ने चिन्ता मुख्य थियो। अर्को ठूलो विवाद तेस्रो राष्ट्रिय सम्मेलनपछि तत्कालीन अध्यक्ष श्यामप्रसाद शर्माले महेन्द्र प्रज्ञा पुरस्कार र मुक्ति पुरस्कार ग्रहण गर्नुभएपछि उत्पन्न भएको थियो। यो विवादले चौथो राष्ट्रिय सम्मेलन बहिष्कार गर्ने अवस्थासम्म ल्याइपुर्‍यायो। बाहिर जस्तो देखिए पनि यो वैचारिक विवाद थियो। त्यही समयतिरको ‘महाकाली सन्धि’ विवादले पनि प्रलेसभित्र ठूलै मतभिन्नताको सिर्जना भयो। विस्तारै त्यो अवस्थाबाट पार गरेर पाँचौं राष्ट्रिय सम्मेलनमा आइपुग्दा प्रलेसले संयुक्त मोर्चाको अवधारणा आत्मसात गर्न तयार भयो।
अहिले पनि प्रलेसमाथि विभिन्न कोणबाट प्रश्न उठाइएका छन्। केही प्रश्नहरू प्रलेसभित्रै रहेका जिम्मेवार पदाधिकारीले उठाएका छन्, केही संगठनभन्दा बाहिरबाट उठाइएका छन्। नेतृत्वमै रहेर सार्वजनिक बहस उठाउने साथीहरूले प्रलेसको आन्तरिक बैठकमा प्रलेसले गर्नुपर्ने आगामी कार्यक्रमबारे कहिल्यै सुझाव दिनुभएन, न प्रलेसका निर्धारित कार्यक्रमबारे रुचि देखाउनुभयो। प्रलेसको औचित्यबारेमा प्रश्न उठाउने अर्काथरी साथीहरू झन् इमानदार बन्न सकेनन्। संगठनभित्र रहँदा एउटा कार्यशैली अख्तियारी गर्ने तर बाहिरिएपछि आफ्नै कार्यशैली बिर्सिएर आरोप लगाउने प्रवृत्ति नैतिक होइन। केही साथीको यस्तो द्वैध चरित्र सबैले छर्लंग देखेकै छन्।
प्रलेसको दसौं राष्ट्रिय सम्मेलनमा आगामी नेतृत्व कस्तो बनाउने भन्ने विषयमा व्यापक छलफल भएकै थियो। कुनै पनि वामपन्थी पार्टीमा संगठित नभएको तर स्वतन्त्र भूमिका रहेर नेपालको प्रगतिशील साहित्यिक आन्दोलनमा महत्वपूर्ण योगदान पुर्‍याउने स्रष्टाहरूको संख्या नेपालमा ठूलो छ। उनीहरूलाई प्रलेसमा आबद्ध गर्नुपर्छ भनेर हामीले निकै गृहकार्य गर्‍यौं। त्यही मान्यताका आधारमा स्वतन्त्र साहित्यकारहरूलाई समेट्ने जिम्मेवारी कवि संगीत श्रोताले लिनुभयो। हाम्रो यही निर्णय क्रियान्वयन गर्ने बैठकमा विष्णु भण्डारीले ‘प्रलेसमा स्वतन्त्रहरूलाई ल्याएर नेतृत्व सुम्पने कुराप्रति मेरो सहमति हुँदैन’ भन्दै बहिष्कार गर्नुभयो। तर विडम्बना, संगठनबाट पलायन भएपछि उहाँले नै ‘प्रलेस पार्टीका कार्यकर्ताहरूले भरिएका छन्’ भन्ने आरोप लगाउनुभयो। यस प्रकारका धारणालाई आधार मान्ने हो भने प्रलेसको औचित्यबारे प्रश्नहरू वस्तुसम्मत नभएर मनगढन्ते र कपोलकल्पित मात्र छन्।
फुटको सम्भावना यसरी टर्‍यो
प्रलेसको चौथो राष्ट्रिय सम्मेलन बहिष्कार गर्ने सांस्कृतिक संघसंस्थासँग प्रलेसलाई पुनः संयुक्त मोर्चा बनाउन प्रयत्न गर्ने कि फुट्ने भन्ने विकल्प मात्र बाँकी थियो। कवि कृष्ण सेन इच्छुक नेतृत्वको अखिल नेपाल जनसांस्कृतिक संघका साथीहरूको अनुरोधलाई तत्कालीन इन्द्रेणी सांस्कृतिक समाजले स्वीकार गरेको भए प्रलेस त्यसबेलै फुट्थ्यो। ‘कलम’ साहित्यिक त्रैमासिकका सम्पादकीय र त्यसबेलाका लेखकहरू यसका साक्षी छन्।
प्रलेसलाई फुटाउनु कुनै गाह्रो काम होइन, तर केका लागि फुटाउने भन्ने जवाफ दिन सक्नुपर्छ। सबै राजनीतिक पार्टीका आ–आफ्ना सांस्कृतिक संगठन छन्। तिनले नेपालको क्रान्तिकारी सांस्कृतिक आन्दोलनमा कति भूमिका निर्वाह गरे ? स्वतः यो प्रश्न हाम्रा अघिल्तिर आइहाल्छ। संस्था निर्माण गर्नु मात्र ठूलो कुरा होइन, त्यसले सम्पादन गर्ने काम महत्वपूर्ण हो। चउरमा बसेर घाम ताप्दै एउटा संस्थाको ब्यानर झुन्ड्याउनुले सांस्कृतिक आन्दोलनमा खासै महत्व राख्दैन र राख्नुहुँदैन पनि।
प्रलेसमा फुट ल्याउने कोसिस कुनै अँध्यारो कुनामा भइरहेको हुन सक्छ। केही व्यक्ति प्रलेसमा सहभागी नहुनेबित्तिकै त्यसलाई फुट भन्नु पनि हुँदैन। समाज रूपान्तरणको पवित्र इच्छा छ भने प्रलेस फुटाइरहनै पर्दैन, आफ्ना सांस्कृतिक संगठनमार्फत समाज रूपान्तरणमा अघि बढ्दा समर्थन र सहयोगका हातहरू बढ्न सक्छन्। अँध्यारो कुनाको चिया पसलमा बसेर गरिने निन्दा र खिसिट्युरीले सम्पन्न सांस्कृतिक चेतना विकास हुँदैन, बरु विनाश हुन्छ।
प्रलेस सरकारी संस्था होइन
प्रलेस सरकारी मानिसका हातमा पुग्यो भनेर पनि निन्दा गरिन्छ। त्यस्ता साथीहरूले दसौं राष्ट्रिय सम्मेलनपछिका गतिविधिको अभिलेख खुला दिमागले हेरिदिने हो भने जवाफ खोज्न अन्त जानै पर्दैन। यसले प्रतिरोधी संस्कृति निर्माणकै पहल गरिरहेको छ। प्रलेसको स्थापनादेखिका कामको मूल्यांकन गरौं, भ्रमहरू सफा हुन बेरै लाग्ने छैन। केही संस्कृतिकर्मी र संस्थालाई दुई वामपन्थी पार्टी (एमाले र माओवादी केन्द्र) को एकताले सन्त्रास पैदा गराएको छ। त्यसको उपचार आफ्नै चेतनाले गर्ने हो। प्रलेस प्रतिरोधी चेतनाको प्रतिनिधि स्वर हो र बन्नुपर्छ भन्नेबारे अहिले प्रलेसको नेतृत्व समूह सचेत र गम्भीर छ। अहिले केही साथीले आफूले चलाएको संस्थालाई प्रतिरोधी संस्कृतिको केन्द्र भनेर प्रचार गरिरहनुभएको छ। ती संस्थाहरू र प्रलेसले यसबीचमा गरेका गतिविधिको मूल्यांकन गरियोस्, यथार्थ छर्लंग हुनेछ।
केही साथीलाई खिसिट्युरी गर्नु, गाली गर्नु क्रान्तिकारी काम हो भन्ने भ्रम कुहिरोले ढपक्कै गाँजेको छ। यो आफैंमा गैरक्रान्तिकारी काम हो। यो भ्रमबाट मुक्त भएपछि धेरै समस्या आफैं हल भएर जान्छन्। प्रलेस प्रतिरोधी चेतनाको प्रतिनिधि संस्था र आवाज हो।
अबको प्रलेस
प्रलेसमा आबद्ध सांस्कृतिक संगठनहरूबीच गम्भीर मतभिन्नता छन्। वर्तमान समाजको चरित्रलाई बुझ्ने प्रश्नमा हाम्राबीचमा साझा धारणा बन्न सकेको छैन। प्रलेसमा आबद्ध केही सांस्कृतिक संघले हिजोदेखि भनिँदै आएको नेपाली समाजको अर्धसामन्ती र अर्धऔपनिवेशिक चरित्रमा फरक आएको धारणा राखिरहेका छन् भने केहीले उक्त चरित्र यथावतै रहेको विचार प्रस्तुत गरेका छन्। नेपाली समाजको चरित्रमा परिवर्तन आएको धारणा राख्ने सांस्कृतिक संस्थाले सामाजवादी संस्कृति निर्माणको बाटोलाई आफ्नो कार्यदिशा बताएका छन्। नेपाली समाजको चरित्र उहिल्यैको जस्तो अर्धसामन्ती र अर्धऔपनिवेशिक छ भन्नेहरूले जनवादी संस्कृतिकै कुरा गर्छन्। यो ठूलो वैचारिक मतभेद हो। यसलाई समीक्षा गरेर प्रलेसलाई आउँदा दिनमा संयुक्त मोर्चाका रूपमा अघि बढाउन निश्चितै रूपमा केही पहल गर्नुपर्ने अवस्था छ।
यतिबेला सामन्तवादी कला संस्कृति पनि आफूलाई योजनाबद्ध ढंगले संगठित गर्ने प्रयत्न गर्दैछ। साम्राज्यवादी साहित्य संस्कृति हाम्रो समाजमा आफ्नो जवानस्वरूप बोकेर प्रवेश गरेको छ। यो अवस्थामा प्रगतिशील लेखक संघको आवश्यकता झन्झन् बढेर गएको छ। बरु, मूल कुरो हामी आफूलाई समयको आवश्यकताअनुसार मैदानमा उतार्न सक्छौं कि सक्दैनौं भन्ने नै हो। सिर्जनाका माध्यमबाट यो दायित्व पूरा गर्नु सबै प्रगतिशील लेखकको कर्तव्य हो।
प्रलेसलाई यो ऐतिहासिक कर्तव्य पूरा गर्न आवश्यक छ भन्नेहरूले चलाउने हो। आवश्यकता नदेख्नेले अनावश्यक समय खर्च गर्नुभन्दा स्वेच्छाले समाजहितको काम खोजी गरेर आफ्नो अमूल्य समयलाई मूल्यवान् बनाउन लगाउनु सबैका लागि हितकर हुन्छ। तर सिर्जना र संगठन दुवै क्षेत्रबाट प्रलेसको औचित्य र आवश्यकता यतिबेला झनै बढेर गएको छ।
(पोखरेल प्रगतिशील लेखक संघका अध्यक्ष हुन्।)
www.annapurnapost.com बाट साभार 

Thursday, July 5, 2018

चियाको खैरो जालो - मातृका पोखरेल



रेडियोमा वि.वि.सि. नेपाली सेवाको समाचार आउनै लागेको थियो । सांसद् हिरादत्तलाई आजको कुनै पनि समाचार सुन्ने मौका मिलेको थिएन । विहानदेखि बेलुकासम्म तीन चार ठाउँहरूमा भेटघाट र मिटिङहरू भ्याएर बेलुका एकजना साथीसँग रेष्टुरेन्ट छिरेका उनी ढिलै गरेर आफ्नो डेरामा आइपुगेका थिए । बाटोमा आफ्ना सांसद साथीहरूको लगातार मोबाइलमा घण्टी बजिरहेको थियो । रेष्टुरेन्टमा उनले निकै पिएका थिए । साथीहरूले पिउने कुरा थाहा पाइहाल्छन् कि भन्ने डरले उनले मोवाइल रिसिभ गरेनन् । 
“तर आज किन धेरै साथीहरूको फोन आयो” हिरादत्तभित्र प्रश्न नउब्जेको होइन । घटनाको कुनै अन्दाज सम्म गरेनन् उनले ।

“आज धेरै पिएर आउनु भयो कि के हो ?” खानाको थालीमा तरकारी राख्दै गर्दा पारूले हिरादत्तलाई छासिन ।

“अरू दिनको भन्दा आज अलिक बढ्तै भएछ ।” स्वीकारोक्तिमै बोले उनी ।

पारुले किचेन टेबुलमाथि खाना राखि दिइन् । हिरादत्तले खानाको थाली सार्दै रेडियोलाई आफू नजिकै ल्याएर राखे ।

खाना खान सुरु गर्दागर्दै उता वि.वि.सि नेपाली सेवाले पनि समाचार भन्न सुरु ग¥यो । पारु पनि खानाको थाली लिएर टेबुलको एकाछेउमा बसिन् ।
प्रमुख समाचारमैं रेडियोले भन्यो । “नेपालमा प्रधानमन्त्रीद्वारा गरिएको संसद विघटनको सिफारिस राष्ट्रपतिद्वारा स्वीकृत भएको छ ।” अचानक दुवै जनाले मुखमा पुग्नै लागेको भातको गाँसलाई टक्क रोके र एकले अर्काेलाई हेरे ।

रेडियोले पुरा समाचार भन्न बाँकी नै थियो । 

एकाएक दुवैको अनुहार ठूलो आँधीबेहरी आउन लागेको समय जस्ते कालो अँध्यारो भयो । तर दुबै जना मौन बसे । केही बोलेनन् । 

“बाबु र नानीले खाना खाइसके ?”
मौनता तोड्न खोजे हिरादत्तले ।
“अँ ! खाएर पनि सुतिसके ।” संक्षिप्त उत्तरमै टार्न खोजिन पारुले ।
“भोलि त विदा हो नि उनिहरूको !”
हिरादत्तको स्वर मलिनो थियो ।
“विदा त हो, आज स्कूलले बीस हजारको बील पठाएको छ ।” हिरादत्तको अनुहारतिर नहेरिकन बोलिन पारु ।
“ओ हो ! बीस हजार !” हिरादत्त झस्किए । 
“पहिले पनि त्यस्तै त आउन्थ्यो नि !
त्यस्तो महंगो स्कूल छ ।” पारुले थपिन् ।
“मैले त तिमीलाई भनेकै थिए नि ! अलिक साधारण स्कूलमा राखौँ है भनेर !” हिरादत्तको स्वरमा सानो आक्रोस झल्कन्थ्यो । 

“हामी बसेको घर मालिक एउटा सामान्य खरदार हो । उसले पनि आफ्ना छोराछोरीलाई त्यही स्कूलमा राखेको छ । त्यति पनि नसक्ने हो भने यत्रो नेता हुँ भनेर किन हिँड्नु प¥यो !” पारुले पनि एउटा सानो वाणको झटारो हानिन् ।

हिरादत्तले अरू प्रतिक्रिया दिन आवश्यक ठानेन् । खानाको थालीबाट आँखा उठाएर पारुतिर हेर्न आवश्यक पनि ठानेनन् ।

उनीहरू पहिलेपहिले कहिलेकाहीँ राजनैतिक छलफल पनि गर्थे । संसदमा भइरहेको अन्र्तसंघषबारे पनि कहिलेकाहीं कुराकानी गर्थे । तर उनीहरूले कुनै राजनैतिक छलफल गरेनन् आज ।
    
000
                    
हिरादत्त र पारु सुत्ने कोठामा पुगे । आजै धोएका लुगाहरू असरल्ल ओछ्यानभरी छरिएका थिए । पट्याउने जांगर त पलाएको थिएन, तर काम साँच्न मन लागेन पारुलाई । ओछ्यानका लुगाहरू सोहोरेर भुइँमा थुपारी र लोग्नेलाई सुत्ने ठाउँ तयार पारी दिई ।

पार्टीमा पिएको ‘ह्याङओभर’ हिरादत्तमा अझै बाँकी नै थियो । लुगा नफुकालिकन उनी डङ्ग्रङ्ग ओछ्यानमा पालिए ।

“अब के गर्ने होला भनेर तपाईंलाई त कुनै चिन्तै छैन जस्तो छ । मलाई त कस्तो छट्पटी भइसक्यो ।” पारुले कपडा पट्याउँदै कुरा निकालिन् ।
“अब गाउँ जाने, काम गर्ने बस्ने !” सन्त्रास भरिएको मनबाट हिरादत्तले खरो कुरा गरे ।

“जानु भो गाउँ ! गाउँमा अचेल तपाईंलाई मान्छेहरूले कस्तो गाली गर्छन् । तपाईंले त के सुन्नुभाको छ र ! मैले पो सुनेकी छु त !” गाउँ जाने कुराले पारु त्रस्त थिईन् ।

“चुनाव जितेर गएपछि गाउँमा विकास त कता हो कता भत्ता मात्र खाएर बसे । गाउ पनि फर्किएर आएनन् । यस्तै यस्ते कुरा गरेर चाहिँदोनचाहिँदो गाली गर्दा रहेछन् तपाईंलाई ।” यति भनिसकेर पारुले पुलुक्क फर्किएर हिरादत्तलाई हेरिन् ।

केही नबुझेर मात्र हामीलाई गाली गरेका हुन् ।” हिरादत्तले मलिनो अनुहार लगाउँदै जवाफ फर्काए ।

“मान्छेहरूले त्यो कुरो बुझ्नु प¥यो नि !” पारूले आफूभित्रको डरलाई अलिकति पखालीन् । 

“बुझाउन शिवाय हामीसँग अर्काे उपाय पनि त छैन नि ! हामी धेरैजसो सांसदहरू त एक प्रकारले जागिरे जस्ता मात्र थियौँ । सबै कुराको निर्णय त नेताहरूले मात्र गर्थे ।” हिरादत्तले नम्र स्वरमा पारूलाई प्रष्ट बनाउन खोजे ।
“आज म अलिक बढि नै थाकेको छु । म अब निदाउँछु ।” हिरादत्त भित्तातिर कोल्टे फर्किए । 

“चुनाव जित्न लिएको लाखौँ ऋण छ । परिवारमा नबेच भन्ने सल्लाह दिँदादिँदै पनि पैत्रिक अंसमा आएको बजारको परारमात्र बेचेको घडेरी चुनाव जित्नका लागि गाउँगाउँका मानिसहरूलाई उनीहरूले मागेजति गरिदिन्छु भनेर दिएको आश्वासन !’ उसको मानसपटलमा चलचित्रका दृश्यझैँ सवैकुरा एकाएक आउन थाले । जति सोच्दै जान्थ्यो, उसको हृदयभित्र आतङ्कको एउटा पहाड सिर्जना हुन्थ्यो । 

निद्रा आउने त कुनै छनकनै थिएन । 

पारुलाई थाहा थियो —हिरादत्तलाई बेलाबेलामा चिन्ता र निरासाले गाँज्यो भने सुत्ने बेलाबेलामा चिन्ता र निरासाले गाँज्यो भने सुत्ने बहाना गर्छन र ओछ्यानमा आँखा चिम्लेर पल्टी रहन्छन् । 

000

“किन बोल्दिनौ तिमी ? तिमीलाई निद्रा लागेको छैन जस्तो छ !” सांसद हिरादत्तले बिहान उज्यालो हुने बेलातिर आफूले केही थाहा नपाएझैँ गरेर पारुलाई सोधे ।

विहान चार बजिसकेको थियो । दुबैजना निदाएका थिएनन् । हिरादत्त र उनकी पत्नी पारु दुवै जनाले रातभरीनै निदाए जस्तो अभिनय गरिरहेका थिए ।

“होइन म निदाएर ब्युँझेकी हुँ ।” हिरादत्तकी पत्नी पारुले कुरा लुकाउँदै भनिन् ।

हिजो बेलुकाको समाचार दुवैले सुनेका थिए । तर दुवैले यो समाचारको बारेमा कुनै चर्चा गरेनन् । दुवैको मनमा आतङ्कको एउटा हुण्डरी चलिरहेको थियो ।

“तपाईं चाहिं निदाउनु भएको छैन कि के हो ?” भित्तातिर फर्केर पारुले हिरादत्तलाई सोधिन् ।

“म पनि निदाएरै ब्युँझेको हुँ ।” पारुले दिएजस्तै उत्तर दिए हिरादत्तले पनि ।
आफूहरू दुवै जनालाई खासै चिन्ता नभएको कुरा देखाउन खोजिरहेका थिए उनीहरू । तर हिजो वि.वि.सि.को समाचार पछि दुवै जनाको अनुहारमा आतङ्कको एउटा छायाँ दौडिरहेको थियो । 

उनीहरू उज्यालो हुने वित्तिकै ओछ्यानबाट उठे । घरमा एउटी काम गर्ने मान्छे थिइ शान्ता । शान्ता गाउकै केटी हो । ऊ चिया लिएर आई कोठामा । 
शान्ताले चियाका कपहरू टेबुलमा छाडेर गएको पनि निकै समय भइसकेको थियो । कप उठाउन आउदा मात्रै देखी उसले । उसले ल्याएको कपमा जस्ताको तस्तै थियो चिया । चियामा खैरो जालो तैरिरहेको थियो ।

माननीय हिरादत्त सोफाको एउटा छेउमा बसेर झ्यालबाट एक तमासले पूर्वतिर  हेरिरहेका थिए । सोफाको अर्काे छेउमा बसेर सांसद् पत्नी पारु पश्चिमतिर फर्किरहेकी थिइन् ।

“मालिक्नी साहेब चिया त चिसो भइ सकेछ नि ! फेरि तताएर ल्याइदिऊ कि !” शान्ताले अचम्म मान्दै भनी ।

“होइन होइन तताउनु पर्दैन । धेरै चिसो भइसकेको छैन ।” पारुको बोली थर्थराइरहेको थियो ।
“अँ ! पर्दैन पर्दैन !” हिरादत्तले पनि थपे ।

“आज के भएछ दुवै जनालाई !” मनमनै सोच्दै शान्ता भान्सातिर गई ।

शान्ता बाहिर निस्कने बित्तिकै हिरादत्तले चियाको कप लगेर ओठमा टाँसे ।

“ओहो ! चिया त बरफ जस्तै चिसो भइसकेको रहेछ ।” ओठ विगार्दै प्रतिकृया दिए हिरादत्तले ।

चियाको कप समातेर ओठमै पु¥याउन लागेकी पारुले हिरादत्ततिर फर्र्किएर हेरिन् । हिरादत्तको ओठमा चियाको खैरो जालो तुन्दु्रङ्ग झुण्डिरहेको थियो ।

0

ताप्ली—४, थामखर्क, उदयपुर
shabdayatra@gmail.com

Thursday, May 31, 2018

मातृका पोखरेल





जन्म मिति : ९ असार २०२३
: 23 June 1966
पिता : नन्दलाल पोखरेल
माता : सीतादेवी पोखरेल
जन्मस्थान : ठानागाउँ गाविस–४, थामखर्क, उदयपुर
शिक्षा : एम.ए. (नेपाली), त्रिभुवन विश्वविद्यालय

संलग्नता 
अध्यक्ष : प्रगतिशील लेखक सङ्घ, नेपाल
वरिष्ठ उपाध्यक्ष : नेपाल साहित्यिक पत्रकार सङ्घ
कार्यसमिति सदस्य : पारिजात स्मृति केन्द्र
कार्यसमिति सदस्य : रमेश विकल साहित्य प्रतिष्ठान
कार्यसमिति सदस्य : देवकोटा लुसून प्रज्ञा प्रतिष्ठान
कार्यसमिति सदस्य : घनश्याम ढकाल सांस्कृतिक प्रतिष्ठान
कार्यसमिति सदस्य : निर्मल लामा स्मृति प्रतिष्ठान
सल्लाहकार : वेदना साहित्यिक त्रैमासिक
सल्लाहकार : स्रस्टा साहित्यिक त्रैमासिक
सल्लाहकार : सुनाखरी सन्देश, साहित्यिक पत्रिका
सल्लाहकार : ज्योति साहित्यिक त्रैमासिक 

अन्य संस्थागत अनुभव
प्राज्ञ परिषद सदस्य : नेपाल प्रज्ञा-प्रतिष्ठान ( २०७१ भदौ २०  - २०७५  भदौ १९ )
संयोजक : एकीकृत अखिल नेपाल जनसाँस्कृतिक महासङ्घ ( २०६९साउन २०७३ बैशाख )
अध्यक्ष : नेपाल बाल साहित्य समाज (वि.सं-२०६९ चैत्र - २०७० जेठ)
का.वा. अध्यक्ष : एकीकृत अखिल नेपाल जनसाँस्कृतिक महासङ्घ (२०६९असार-२०६९ साउन)
उपाध्यक्ष : एकीकृत अखिल नेपाल जनसाँस्कृतिक महासङ्घ (२०६६चैत-२०६९ असार)
सह-संयोजक : एकीकृत अखिल नेपाल जनसाँस्कृतिक महासङ्घ (२०६५ माघ-२०६६चैत)
उपाध्यक्ष : प्रगतिशील लेखक सङ्घ, नेपाल (वि.सं - २०६९ चैत देखि २०७२ चैत सम्म)
उपाध्यक्ष : एकीकृत अखिल नेपाल जनसाँस्कृतिक महासङ्घ (२०६६चैत-२०६९ असार)
महासचिव : प्रगतिशील सांस्कृतिक संगठन (वि.सं - २०६३ मङ्सिर - २०६५ माघ )
सचिव : प्रगतिशील लेखक सङ्घ, नेपाल (वि.सं - २०६३ देखि २०६६ सम्म)
सदस्य-सचिव : पारिजात स्मृति केन्द्र (वि.सं - २०६६ देखि २०७१ सालसम्म)
कार्यसमिति सदस्य : साहित्य सदन, नेपाल (वि.सं - २०६५ देखि २०७२ सालसम्म)
कार्यसमिति सदस्य : मार्क्सवाद अध्ययन-अनुसन्धान प्रतिष्ठान (वि.सं - २०७२ देखि २०७३ सालसम्म)
कोषाध्यक्ष : प्रगतिशील लेखक संघ, नेपाल (वि.सं - २०५९ देखि २०६३ सम्म)
कोषाध्यक्ष : इन्द्रेणी सांस्कृतिक समाज (वि.सं - २०५४ देखि २०५९ जेठ सम्म)
संस्थापक सचिव : लोकतान्त्रिक स्रष्टाहरुको संयुक्त मञ्च, नेपाल (वि.सं - २०६१)
संस्थापक सदस्य : नेपाल साहित्यिक पत्रकार सङ्घ (वि.सं - २०६३)
संस्थापक सदस्य : घनश्याम ढकाल सांस्कृतिक प्रतिष्ठान (वि.सं - २०६९)
संस्थापक सदस्य : देवकोटा लुसून प्रज्ञा प्रतिष्ठान (वि.सं - २०६९)

राजनैतिक अनुभव
पार्टी सदस्यता : २०४४ साल बैशाखमा तत्कालिन नेकपा (चौम) का नेता श्याम श्रेष्ठबाट पार्टी सदस्यता प्राप्त ।
जिल्ला समिति सदस्य : २०४८ देखि २०५७ सम्म नेकपा (चौम) , नेकपा ( मशाल ) र सर्बहारावादी श्रमिक संगठनको एकता पश्चात् बनेको नेकपा (एकता केन्द्र) को काठमाडौ जिल्ला समिति सदस्य ।
क्षेत्रीय व्युरो सदस्य : २०५७ देखि २०६४ सम्म नेकपा (एकता केन्द्र) को बाग्मती क्षेत्रीयव्युरो सदस्य ।
राज्य समिति सदस्य : २०६५ साल देखि २०७० सम्म नेकपा ( एकता केन्द्र ) र नेकपा ( माओवादी ) का बीच सम्पन्न एकता पश्चात् बनेको एकीकृत नेकपा ( माओवादी ) को राज्य समिति सदस्य र विशेष जिल्ला समिती इन्चार्ज ।
राष्ट्रिय परिषद सदस्य : २०७० देखि २०७३ साल जेठ सम्म एकीकृत नेकपा ( माओवादी ) को राष्ट्रिय परिषद सदस्य ।
केन्द्रीय समिति सदस्य : २०७३ साल देखि .......... 
एकीकृत नेकपा ( माओवादी ) , नेकपा ( क्रान्तिकारी - माओवादी ), नेकपा ( माओवादी ) लगायत दसवटा क्रान्तिकारी पार्टीहरूको एकतापश्चात बनेको नेकपा ( माओवादी केन्द्र ) को केन्द्रीय समिति सदस्य ।


सम्पादन
प्रधान सम्पादक : "समकालीन साहित्य", त्रैमासिक ( नेपाल प्रज्ञा-प्रतिष्ठानको प्रकाशन)
प्रधान सम्पादक : "कथालय" कथाप्रधान साहित्यिक त्रैमासिक 
प्रधान सम्पादक : "प्रलेस" ( प्रगतिशील लेखक सङ्घ, नेपालको मुखपत्र )
प्रधान सम्पादक : "विकल स्मारिका" (रमेश विकल साहित्य प्रतिष्ठानको मुखपत्र )
प्रधान सम्पादक : "रुपाटार स्मारिका - २०६९"
प्रधान सम्पादक : "आलेखन" ( नेपाल साहित्यिक पत्रकार संघको मुखपत्र )
कार्यकारी सम्पादक : "ज्योति" साहित्यिक त्रैमासिक
सम्पादक : "वेदना" साहित्यिक त्रैमासिक
सम्पादक : "स्मृतिमा रूद्र खरेल" (स्मृति ग्रन्थ- २०७१ )
सम्पादक : "विजय शव्दविम्ब"
सम्पादक : "नेपाली डायस्पोराका कविता" (नेपाल प्रज्ञा-प्रतिष्ठान
र गैरआवासीय नेपाली सङ्घद्वारा बि.सं -२०७२ मा प्रकाशित )
अतिथि सम्पादक : "नागार्जुन" त्रैमासिक (गणतन्त्र विशेषांक)
अतिथि सम्पादक : "जनमत" साहित्यिक मासिक, उदयपुर साहित्य विशेषांक

प्रकाशित कृति 
सेतो दरवारको छेउबाट : ( कवितासङ्ग्रह), २०५७
यात्राको एउटा दृश्य : ( कवितासङ्ग्रह), २०६०
सन्त्रस्त आँखाहरु : ( कथासङ्ग्रह), २०६१
अनुहारहरु : ( कवितासङ्ग्रह), २०६४
घाम झुल्किनुअघि : ( कथासङ्ग्रह), २०६७

सम्मान / पुरस्कार 
- धौलागिरी साहित्य प्रतिष्ठानद्वारा अनुहारहरु (कवितासङ्ग्रह) का लागि पाण्डुलिपि पुरस्कार - २०६४
- सिम्पल आर्ट्स सम्मान - २०६९
- स्रष्टा चैत्र -३० सम्मान - २०७४ 

सम्पर्क नं. : ९८४१२८१७०५  (मोबाईल)
इमेल :  shabdayatra@gmail.com

सम्झनाका पानाहरू पल्टाउँदा कवि 'इच्छुक' - मातृका पोखरेल